तेरणेचा छावा/धाराशिव:-
राष्ट्रीय महामार्ग क्रमांक 211 मलकापूर पाटी ,सापनाई, दहिफळ, मोहा या मुख्यमंत्री सडक योजनेअंतर्गत जवळजवळ 16 कोटी रुपयांच्या आसपास रस्त्याचे कामाचे बजेट असताना रस्त्याचे काम अत्यंत निकृष्ट दर्जाचे झाले असून अनेक ठिकाणी अर्धवट स्थितीत आहे. परंतु जो रस्ता झाला आहे तोही अनेक ठिकाणी पूर्णपणे उखडुन निघत आहे. त्यामुळे हा रस्ता सर्वसामान्य जनतेसाठी की अधिकारी व गुत्तेदारासाठी असा संतप्त प्रश्न परिसरातील नागरिकांतून विचारला जात आहे.
हे काम गेल्यावर्षी मंजूर झालेलं असतानाही कामात अत्यंत दिरंगाई व निकृष्ट दर्जाचे काम करत असून कामाच्या इस्टिमेट प्रमाणे काम होत नसल्याच्या तक्रारी पंतप्रधान सडक योजना या कार्यालयाकडे दाखल केलेल्या असतानाही वेळ मारून नेत काम अंतिम टप्प्यापर्यंत पोहोचत आहे. परंतु हे काम अत्यंत निकृष्ट व दर्जाहीन झालेले असून काम पुढे चालू आणि मागे रस्त्यावर खड्डे पडू लागली आहेत तसेच रस्त्यावरील खडी उघडी पडत आहे. त्यामुळे नेमकं काम नागरिकासाठी आहे की अधिकारी, गुत्तेदारासाठी आहे असा प्रश्न जनतेतून बोलला जात आहे. रस्त्याचे डांबर काम भर पावसात केलेले असल्यामुळे रोड लगेच मागून उकरून निघत आहे, खडीत डांबर टाकली की ऑइल टाकले असा प्रश्न नागरिकांना पडत आहे. हा रस्ता मुख्य दळणवळणाचा असल्यामुळे या रस्त्याचे काम इस्टिमेट प्रमाणे व क्वालिटीचे होणे गरजेचे असतानाही काम अत्यंत निकृष्ट व बोगस दर्जाचे झालेले आहे. याविषयी नागरिकांनी वेळोवेळी संबंधित कार्यालयाकडे फोनद्वारे , अर्जाद्वारे तक्रारी दिलेल्या आहेत. कामाची गुणवत्ता अशीच राहिली तर रस्ता लगेच पूर्णपणे उकडून खराब होणार आहे त्यामुळे नागरिकांना या रस्त्याचा नाहक त्रास होणार असल्याने नागरिक आता मोठ्या आंदोलनाच्या पावित्र्यात असल्याचे दिसून येत आहे.
संबंधित विभागाने या कामाकडे आता तरी त्वरित लक्ष देऊन काम इस्टिमेट प्रमाणे व गुणवत्तापूर्ण करून घ्यावे. अन्यथा नागरिक आक्रमक पवित्रा घेण्याच्या मनस्थितीत असल्याचे बोलले जात आहे.
असे असले तरी या गुत्तेदाराला मोठा राजकीय आश्रय व नेतेमंडळींचा बहुतेक लाडका गुत्तेदार अथवा जवळचा नातेवाईक असावा तसेच अधिकाऱ्याचे पाठबळ असल्याशिवाय अशा प्रकारे थातूरमातूर काम होत नसल्याच्या चर्चा नागरिकांतून मोठ्या प्रमाणात ऐकावयास येत आहेत.
0 Comments